| | 
 الاهتمام بنضافة الاسنان يعني مش تبقي واكلة ملوخية وخطيبك ييجي يلاقي سنانك كلها منقطة اخضر يقولك ايه ده ياحبيبتى قوليله ده ترتر يا روحي هههههههههههههههه يعني لازم علطول تغسلي سنانك وبلاش البصل قبل ماييجي ولو مامتك عازماه وعامله اكل فيه توم او بصل بلاش مش وقته خالص يعني
*لازم ريحة الفم "نفسك" تبقي حلوة بجد دي اهم حاجه عشان في ناس كتير بيبقي عندها مشاكل في سنانها او عندها جيوب انفية فابتلاقي غصب عنهم نفسهم ريحته مش حلوة فاحاولي دايما يكون جنبك كلورتس بجد بتخلي ريحه النفس حلوة اوي وحاولي كل شويه تغيريها وبعد الاكل وكده بس ياريت تاكليها براحة بلاش الطرقعة والبلالين و الحاجات الغريبة مش عايزين الولد يطفش ههههه وبرضو في معطرات للفم حلوة اوي بتترش زي السبراي خلي بالكوا النقطه دي مهمه اوي
*ريحه العرق ياريت قبل ماييجي او تنزلي معاه لو مسموح انكوا تخرجوا يعني او حتي في الزيارة عند اهله خلي بالك اوي من ريحه العرق يعني خدي شاور كده قبل ماتشوفيه و حطي مزيل عرق عشان تبقي اعدة واثقة في نفسك و خلي دايما في شنطتك برفان او سبراي عشان لو حصل حاجه تنقذي الموقف مش اول ماترفعي دراعك الولد يغمي عليه ويروح فيها هههههههههه
*بمناسبة ريحه العرق بقي في برضو ناس مع العرق ممكن الشوز يعمل ريحة مش مرغوب فيها طبعا وبالذات اننا بنات مايصحش حد يلاحظ حاجه زي دي فحاولي لو واحده عندها المشكله دي تجيب بودر او كريم فطريات او سبراي لريحه القدم يعني ماتبقيش رايحه لمامته و اول ما تقلعي الشوز ريحته تطلع زي برطمان الفسيخ هههههههه وبرضو حاولي ما تكرريش لبس الشراب اكتر من مره
*الضوافر ودي نقطه مهمه جدا برضو عشان في ولاد بيلفت نظرهم اوي ضوافر البنت يعني لازم تهتمي بنضافة ضوافرك اوي وتبرديها مش لازم يعني تحطي مانكير عشان الصلاه وكده ممكن تعملي حنه او حتي حطي مانكير و بعدين شيليه لما تيجي تصلي و اهتمي اوي بشكل ايدك يعني لازم يحس بفرق بين ايدك وبين ايد صاحبه هههههههه
*خلوا بالكوا كمان من نقطة مهمة اوي الشعر اللي بيبقي في كف الايد او في الايد عموما لو انتي مش عاملة سويت حاولي ماتبينيش ايدك خالص عشان لو حاجه زي دي لفتت نظره هيبقي الشكل العام مش كويس خالص وفقدتي رونقك وحاولي تهتمي بكف الايد بالذات عشان بيبقي باين اوي ولو عندك براون يبقي تمام ممكن تعملي كف الايد بيها بتنجز برضو ابوس ايدك اوعي تفضحينا مخضوضة
*برضو الشعر اللي في الوش وفوق الشفايف بيبقي ملفت جدا واللي هتقولي مش بعمل حواجبي هقولها شقريها واللي وشها حساس مش بتقدر تعمله بالسويت او الفتله برضو ممكن تشقريه واهتمي انك تزيلي شعر المناخير وفوق الشفايف وخصوصا ان الحاجات دي بتظهر اوي لو انتوا خارجين الصبح بيبقي واضح زي الشمس احنا بناااااات مش رجاله لازم تهتمي اوي بموضوع ازاله الشعر اوي عشان في رجاله كتير بتقرف منه اللهم اني بلغت اللهم فاشهد
*اللبس .. طبعا هدومك كلها لازم تكون نضيفة ومكويه وريحتها حلوة يعني مش يكون الدولاب فوق بعضه والهدوم مكرمشه ومكمكمه وتقومي تلبسيها لالالا اوعي والله في اختراع اسمه مكواه مش مطلعه البادي من الخلاط وتلبسيه ينفع كده. ولا تكوني ضاربة ساندوتش فول قبل ماييجي ويبص يلاقي بقعة تسد عين الشمس علي هدومك هههههههه
*لازم برضو النظافه تبقي من جوة ومن بره يعني برضو مش هدومك بس اللي بره هي اللي نضيفه ومرتبه لازم برضو الملابس الداخليه تكون نضيفه وبتبرق هتقوليلي و هو هيشوفها فين بسلامته هقولك لا عشان تبقي اعده واثقة في نفسك من كله ويبقي عندك احساس بالراحه وتبقي هدومك كلها ريحتها حلوة
*الرجلييييين: لازم يا حلوين انتوا نهتم بالرجلين اوي يعني تبقي عملاها باديكير كده ومظبطاها مش ييجي يبص علي رجلك يلاقي حوافر يروح مخضوض ويطلع يجري ههههههه لا لازم بجد عشان دي نقطه مهمة وفي ولاد بتهتم اوي بشكل الايد والرجلين مش نهتم بوشنا ونسيب الباقي لازم تبقي انثي في كل حاجه
*طريقة اكلك لازم تكون براحه وعلي مهلك ماهو محدش بيجري وراكي ولازم تحسسيه بفرق بينك وبينه في طريقه الاكل يعني تحسسيه انك بسكوته كده وعاملة زي البيبيهات وبالذات لما تكوني معزومه عندهم حاولي تنقنقي ههههه مش لازم تاكلي يعني ابقي روحي كملي في البيت صح ولا ايييييه
*اياكي ايااااااااكي والصوت العالي خليكي دايما بنوتة رقيقة و صوتك عامل زي الهمس لان بجد كل الولاد بتتنرفز اوي من الموضوع ده بيبقي عايز يحس انه بيكلم بنت مش واحد صاحبه علشان كمان لو صادفت في شغله انه شاف بنت رقيقة او شاف خطيبة صاحبة مثلا مايقولش شايف البنات دانا سايب عسكري مرور اعد في البيت ههههههههه فاخلي بالك من النقطه دي
*كمان الفاظك ياريت ياريت بلاش المصطلحات الغريبة اللي طالعه اليومين دول اشطه يا عم و يا معلم و يا باشا والحاجات الغريبة دي اه ممكن بينا و بين بعض لكن مش ادام خطيبك خالص ما بدل ما يكلمك بقي يروح يعد مع بواب العمارة ساعتها مش هيحس بفرق كتير علي الاقل البواب هيعمله كباية شاي يشربها هههههههه
*برضو مش تبقي اعده ادامه تلاقي نموسه قرصتك تعدي تهرشي كده ولا تعدي تهرشي في شعرك عصر القمل انتهي خلاص وهتلاقيه بيدور وشه الناحيه التانيه خايف حاجه تطير عليه هههههههههههه
*خلاص ظبطي نفسك واخدتي شاور وغيرتي هدومك وكله تمام تمام وزي الفل نيجي بقي لنقطه مهمة اوي ودي بتبقي عنوان اي ست ..... الاهتمام بنظافه البيت يعني مش يبقي خطيبك جاي ويبقي البيت مقلوب كأنه كان فيه مصارعه تيران من شويه .. يعني اهتمي بنظافة البيت و خصوصا خصوصا الحمام اهتمي اوي انه يكون نضيف وبيبرق ماتخلهوش ياخد عنك وعن مامتك فكره مش كويسه وافضلي لفي كده في الشقه و شوفي ايه اللي ناقص واللي عايز يترتب واعمليه ماتعديش مستنيه مامتك تعمل كل حاجه هي هتعمل ايه ولا ايه عشان احنا منبقاش مفتريين يا بنوتات
*اخر نقطه بقي حاولي تخلي اهلك يدلعوكي شويه ادامه يعني بلاش يا بت ويا زفته والحاجات دي عشان بتلزق في مخ الراجل وهيطلع عينك بعد كده ههههههه لازم تحسسيه انك بونبونايه البيت وانك متدلعه عشان هو يتعود علي كده و يعرف يعاملك بأسلوب حلو مايجيش يقولك حاجه تزعلي منها يروح قايلك ياسلام مانتي دايما اهلك كانوا بيقولولك كده وبلاش تجري تحكيله كل حاجه حصلت والمشاكل بتاعة البيت وماهي مش كل حاجة تتقال صح ولا ايه نخلي منظرنا دايما حلو ومنظر اهالينا حلو عشان مانتعبش في الاخر ونفضل عاليين في نظرهم طول العمر
ربنا يجمع كل بنوتة بخاطبها عاجلا يارب ويسعدكوا جميعا ويتمملكوا بخير |
|
