| | 
السلام عليكم ورحمه الله وبركاته
والصلاه والسلام على افضل الخلق
سيدنا محمد صلى الله عليه وسلم
 اولا الف مبروك لكل عروسه بتجهز ياعروسه يالى بتجهزى عاوزه اقولك نصيحه صغيره
وعاوزه اديكم نصيحه
هديه منى ليكم صدقونى هتعرفو قيمتها بعدين باذن الله
وانتى بتجهزى نفسك حطى مبدأ انك تراعى ظروف اهلك وميزانيتهم
لو انتى والدك ماشاء الله مليونير مش هعارضك وهقولك ليكى حق تجهزى شقتك
من الابره للصاروخ لكن ,, فى اهل مش بيحبو يبينو لبنتهم ان فى حجات نفسهم فيها
ومش هيقدرو يجيبوها ويبتدو يعملو ايه جمعيات وسلف وديون والجمعيات دى بردو تعتبر ديون
على مر الوقت ولقدر الله مره شوفت ام اتسجنت علشان كانت بتشور بنتها
واستلفت 600 جنيه واتاخرت بدفعهم وللاسف الديان مكنش بقلبه رحمه
والست اتسجنت علشان مبلغ ممكن حد مننا لو راحت محل ملابس تجيب بيهم شنطه
مش كل حاجه ياقلبى تجبيها هاتى اللى يفيدك ومهم بس
هترجعى تقوليلى الناس هتتكلم صدقينى لو داخله حاجتك بياقوت والماظ الناس هتتكلم
وصدقينى بقناعتك انتى ورضاكى وحبك لبيتك وجوزك ده فى عنيهم هيخلو
لو حاجتك بلاستيك هيشفوها كنز كفايه انك ببيتك معززه مع راجل محترم وصاينك
وبعدين بعد الجواز صدقينى فى حجات هتحتاجيها وتشتريها عجبك طقم حلو عجبك
قمص نوم حلو لانك هتزهقى من اللى عندك مهما كان كترهم
نقطه كمان وانتى نازله تشترى مش كل حاجه تشوفيها تشتريها لانك هتملى
شوارك حجات مالهاش لازمه وممكن فى نزوله تانيه تشوفى حاجه محتجاها اوى لكن
بعد ايه ماانتى صرفتى فلوسك على حجات مش محتجاها
هتجيبى كراسه هتسجلى فيها كل تحتجيه وبس واللى اشتريتيه تعلمى عليه
عندك مثلا طقم التيفال الطقم ده بالنسبه لناس غالى اوى مش شرط تجبيه كلو
هاتى الضرورى بس واهو هيبقى طقم بردو وعندك تيفال
طقم الحلل الالومنيوم مش شرط تجيبى الطقم الكبير لانك هتلاقى فى حلل
كبيره وانتى عروسه مش هتعملى بيها حاجه هاتى الحجم الوسط
مره سمعت من وحده العروسه لازم تجيب 40 اندر لييييييه هتحاربى بيهم سعيدة قوي
لا بدل ماتملى درجك اندرات من ابو التلاته بعشره جنيه
لا هاتى اندرات لزوم البيرود بس ...
واندرات قطن من النضيفه نوع نضيف للايام العاديه والاندرات الشفتشى لزوم الدلع
هتجيبى بالعدد منهم لو جيبتيهم كلهم 20 واحد هيبقو كتير بردو لان كمان اكتر قمصان النوم معاها الاندر بتاعها
بالنسبه للاطقم الميه والشاى والقهوه والنسكافيه وخلافه
هتجيبى من كل نوع طقم واحد مش شرط اربع وسته وسبعه من كل نوع
بكده هيتبقى معاكى فلوس ولو اهلك اتزنقو بمبلغ ممكن الزياده
يكملو بيه حجات اساسيه بفرحك بفستانك بكوافيرك
وبعدين لو فى فلوس بردو فاضت تشيليها ايوا جيتى بعد الجواز
جالك مناسبه عيد ميلادك جوزك مثلا
او عجبك طقم حلو عاوزه تشتريهلان الموديلات دايما تتغير
عاوزه تجيبى هديه لجوزك حصلك اى ظرف طارىء
ببيتك يبقى معاكى فلوس حطيهم فى دفتر توفير وشليهم
هتجيبى بقى اخر نقطه هنتكلمو فيها ورقه وقلم وافرزى كوووول حاجتك
اكتبى عدد ست كوبايات قهوه شفاف وحطى على جمب
وكل مجموعه مثلا من الاطقم هتجيبى شنطه بلاستيك اللى مالين السوق
اللى بيجيبوها الحجاج علشان محدش يقولى شكلها ايه اكيد افتكرتوها هتحطى بقى فيها
الاطقم وفى بيرصو الاطقم جوه كرتونه وتكتبى بورقه ان الصندوق ده او الشنطه دى
فيها اطقم كذا وكذا وكذا وخلاص تتقفل وتتحط بقى متتفتحش الا يوم فرش شقتك
وكمان بالنسبه للملابس هترتبيها حلو بشنطه وسط من البلاستيك دى
طبعا مش كل الهدوم هتاخدى جزء منهم وفى بيحطو بين الهدوم صابونه وتحطى على وش
الشنطه ورقه فيها الملابس اللى موجوده بالشنطه عدد ست بيجامات قطن صيفى لونهم كذا
وتقفلى الشنطه وتركنيها خلاص متتفتحش الا يوم فرشك بكده الكراسه بقى دى
هتكون فيها كل حاجتك بحيث متكرريش وكل شنطه فيها ورقه مكتوب محتويات الشنطه
وبكده تكونى مرتبه ومنظمه بحاجتك
لازم زى مالاهل بيقطعو من لحمهم علشان يفرحونا لازم نراعيهم ياجماعه
وصدقونى الفرحه لا بكتر العفش ولا الفرش
الفرحه براجل يحبك ويصونك وتشوفى فرحه اهلك على وشهم يوم فرحك باذن الله مبسوطة
ربنا يسعدكم يارب واسفه للاطاله ومتنسوش التقييم لو عجبتكم نصيحتى سعيدة قوي |
|
