أزيكم يا أجمل فتوكات في الدنيا عاملين إيه إن شاء الله تكونوا جميعاً بخير وسعاده وكل سنه وأنتم طيبين
الحقيقه يا بنات أنا كنت بعاني من جفاف شعري وتساقط كان رهيييب جربت منتجات كتير أوي وصرفت فلوس كتير وكانت علي الفاضي مع إني شعري كان كل اللي يشوفه كان يشهق ويقولولي كل ده شعر طب بتغسيليه وتسرحيه إزاي كان طول ونعومه ولمعه من غير بيبيي ليس أو سشوار أو أي حاجه من منتجات الفرد اللي مش برجحها ولا بحبها من الأساس لأنها بتهلك الشعر وبتدمره أنا بقي اللي دمر شعري الصبغات شعري بدأ يسقط زي كده بالظبط
الحقيقه اتوهمت وقلت خلاص كده بداية الصلع .. دا غير إن شعري اتحول من عادي إلى جاف فجأه وبقي ناشف وخشن حتي من بعد الزيوت والكريمات كان شعري يرجع تاني يوم ولا كأني حاطه حاجه وألفه كعكه في البيت علشان بقي شكله وحش آوي ونفسيتي بقت مش ولابد
دا لوسيون من الصيدليه بـ 20 ج بتحطيه قبل ما تنامي في فروة شعرك كل يوم لمده أسبوع وبعد كده يوم بعد يوم
ودا الكريم كل مكوناته أعشاب طبيعيه بيقضي على القشره وعلى التساقط بتحطيه بعد غسيل الشعر في فروة الراس
وهو 27 ج من الصيدليه
الأتنين دول اديهم 10 على 10 لانهم مش قللوا التساقط عندي وبس لا دا إتوقف نهائي والحمد لله بعد إستعمال شهرين متتاليين ومازلت مُستمره
بالنسبه للشامبو من الأخر شامبو جليس الأسود بالكرياتين ب 25 ج من أي هايبر ماركت وب 30 من الصيدليه ودي صورته ريحته حلوه بسيبه على شعري دقيقتين كده وبعد كده أغسله بيفرد الشعر ويطريه بجد كلمة روعه قليله في حقه
أما البلسم بردو جليس بس الأبيض دا فيه 19 ماده لمعالجة الشعر الجاف نفس الثمن بستعمله بعد الشامبو على الشعر فقط بعيد عن الفروه وبغسله بعد 5 دقايق بالظبط مش بكتر نتيجته حلوه أوي وريحته جميله ودي صورته
المهم يا فتوكات لو حتعملي حمام كريم سواء كل أسبوع أو مرتين في الأسبوع متحطيش أبدأ البلسم علشان الشعر ميجهدش ويقع الحقيقة أنا استعملت اتنين من حمامات الكريم والأتنين أجمل من بعض الأول حمام كريم ( بوناويل بالقمح ) ودي صورته الحجم الــ 900 ملل تقريباً بــ 80 ج لكن في عبوات صغيره منه إقتصاديه برده ودي صورته
ريحته جنان وبتفضل في الشعر حتي بعد تاني يوم من إستعماله دا غير إنه بيطري وبينعم الشعر جدااااااً
ولأن لازم كل فتره تغيري حمام الكريم فكان البديل هو ماسك الشعر من غارنييه التحفه دا
رااااائع من هنا للسنه الجايه سعره 45 ج من أي هايبر ماركت وفيه ناس بتبيعه ب50
بالنسبه لحمام الزيت ودا أنا بعمله كل أسبوع مره زيت جدايل الحقيقه وبشهاده كل اللي استعملوه مكنتش مصدقه إنه حلو آوي كده ونتيجته بتظهر بعد فتره من إستعماله فعلاً روعه روعه بجد ودي صورته
هو ثلاثة أنواع لتطويل الشعر ونوع أخر للقشره واخر للتساقط أتأكدي بس أنه الأصلي من عبد الصمد القرشي هو ب 110 تقريباً يا بنات وفيه بيبعوه هنا في المول بــ 90
كريم التصفيف إستعملته فتره وبعد كده غيرت لأني مش بحب أستمر على منتج واحد هو ( ياردلي ) فيه منه بالعسل اللي غطاه أصفر والتاني الموف باللافندر ريحتهم قويه أوي وثابته فى الشعر وغير دهني دا كان ب 27 ج من أي هيبر ماركت
نيجي بقي لحبيبي وحبيب الملايين سيروم الزيرو فريز بجد WOW روعه ريحه ولمعه ونعومه مفيش بعد كده
اللي مجربتوش والله مش هتندم جربيه وهتشوفي الفرق وهو 45 ج وفيه ناس بتبيعه ب 50 ودي صورته
فيه كمان يا بنات سيروم اكتشاف الحقيقه وهو دابر أملا بزيت الحيه جربته لما حبيت اغير الزيرو فريز الصيدلي نصحني بيه وبعد استعماله لقيته روعه فعلاً دي صورته هو ب 35 ج وفيه ناس بتبيعه ب 50 مش عارفه ايه تفاوت الأسعار اللي يغيظ دا المهم فيه منه ثلاثة أنواع للشعر الجاف ولونه فسدقي مدهب وللشعر المجعد لونه برتقالي وللشعر العادي لونه روز الحقيقه الثلاثه مش زي بعض لأن التركيز بيخف من نوع للتاني وأتقلهم هو اللي للشعر الجاف ودي صورته
سعره 45 ج من أي هايبر ماركت وفيه ناس بتبيعه ب50
