وجتني.. بس انا مدري شعرت الجيّه هـذي غيـر
وهي تقرب من عيوني شعرت ان الممـات اقـرب

وقلت:- الله يهوّنها عسى فـي جيّتـك لـي خيـر
انا من شفتـك أقبلتـي وانـا خايـف ومستغـرب

على كثر الحكـي مـدري كأنّـه خانهـا التعبيـر
هدَت فجأه.. تطالعني وأنـا فـي حاجـة التفسيـر

لجل نحكي بهدوء اكثر سألت الحلوه:- وش تشرب؟
فصاحت بي:- انا احبك ولك فـي هالحشـا تقديـر

وتدري ان المثل فينـا وفـي احساسنـا يُضـرب
صحيح انك "وفي" وانك "بري" من تهمة التقصيـر

ولكـن ذي عوايدهـم مـن ايـام وزمـن يثـرب
وتدري الاقربون اولى .. مع انك للخفـوق اقـرب

وتـدري للقـدر كلمـه.. لعـادات الأهـل تأثيـر
لذا أرجوك تتركنـي وانـا مـن دنيتـك باهـرب

شعرت بحكْيهـا كنّـه قصـاص وامـر بالتعزيـر
شعرت الدنيا ضاقت بي من المشرق ليـا المغـرب

مشَت .. خلّت وراها طفل ما يـدرك وش التدبيـر
يحسْب ان الغرام اشعار شاعر .. واغنية مطـرب

ضحكت وماقدرت انـي ألاقـي لضحكتـي تبريـر
من اللي بوقتنا مرّه ضحـك مـن لدغـة العقـرب

رفضت أستوعب اللي صار ولا استسلمت للتغييـر
ثمان سنين اجي نفس المكـان بساعـة المغـرب

برغم ان الثمـان سنيـن جـرح وكلّفتنـي كثيـر
أنا لليوم أجي وأدعي.. تجي يـارب تجـي يـارب